بين "سيلفي الشواه واه" ودورية وزارة الداخلية: فين مشى واجب التحفظ وستر عائلات الملاح يا سعادة النائب؟

مراد العطشان - رئيس التحرير

غادي نكتب هاد لعمود بالدارجة المغربية باش كلامي يوصل نيشان وما يبقاش لا لبس ولا غموض فالتعبير. شفنا التدوينة اللي نشرها نائب رئيس مقاطعة المدينة، اللي حاول يغلف فيها الواقعة بلغة وجدانية وحنين للملاح. ولكن اللي نسا "السي النائب" هو أن هاد التصرف ماشي غير سقطة أخلاقية، بل هو خرق صريح لمبادرات وتعليمات وزارة الداخلية اللي كانت واضحة بخصوص "قفة رمضان".

فكل فقرة من كلامك يا سعادة النائب، غا نلقاو بلي نتا فجهة وتوجهات وزارة الداخلية فجهة أخرى. الوزارة كانت صارمة فمنع المنتخبين من الإشراف المباشر على توزيع المساعدات، باش ما يتحولش "فعل الخير" لوسيلة استمالة أو دعاية سياسية. مبادرات الداخلية أكدات بلي التوزيع خاصو يدوز فصمت وعبر السلطات المحلية، ماشي بـ "سيلفيات" كتهدم كرامة الناس وتضرب فمبدأ الحياد اللي فرضاتو الوزارة.

كيهضر سعادة النائب على "مقطع مبتور" وعلى "سياق كامل". حنا غانسولوك: واش كاين شي سياق فهاد الدنيا كيسمح ليك تضرب بعرض الحائط تعليمات وزارة الداخلية اللي بغات تحمي المغاربة من "الاستعراض" بالمساعدات؟ ملي كتقول لعيالات الملاح "العالم كولو غايشوفكم.. الشواه واه"، راك كتأكد بلي الهدف كان هو "الفرجة" ونشر الوجوه، وهادشي هو اللي حذرات منو وزارة الداخلية فكل المبادرات ديالها باش تحفظ ستر العائلات المعوزة.

مبادرات وزارة الداخلية بخصوص الدعم الاجتماعي كتهدف للفعالية والكرامة، ماشي لخدمة الأجندات الشخصية. الملاح محتاج لمسؤولين كيخدمو فالخفاء وكينزلو مبادرات الدولة الحقيقية، ماشي لـ "مؤثرين" كياخدو الإذن من ناس "محتاجين" باش يحولوا الفقر ديالهم لـ "محتوى رقمي". الإذن اللي كتقول بلي خداوه منك دوك العيالات، راه إذن "ديال الحياء"، ولكن القانون والدوريات الوزارية كتقول بلي الستر هو الأصل.

العمل الصادق يا سعادة النائب هو اللي كيحترم قوانين البلاد وتعليمات وزارة الداخلية اللي خرجات باش تحمي كرامة المواطن من "الشواه" ومن التوظيف السياسي. الملاح كبّار وعزيز، وولاد الملاح مكيقبلوش الصدقة اللي متبوعة بـ "الفضيحة" والخرق القانوني.

كرامة المراكشيين فوق كولشي.. والقانون فوق الجميع.